तिम्रै जस्तो मेरो

मुटु झिकी देखाईदियौ घाउ कति गहिरो छ

तिम्रै जस्तो मेरो पनि छातिभित्र पहिरो छ

खसेको छु तल तल आफ्नै मनको भिरैभिर

सक्ने भए रोईदिन्थें तिम्रो पनि सबै पिर ।



कति मनका घाउहरु समयले छोपिदिन्छ

कति मनमा घाउ अझै समयले खोपिदिन्छ

जे गरे नि भोग्नै पर्छ निधारमा लेखेजति

कहाँ पाईन्छ र खुशी मात्रै मनले देखेजति ।



सयौं मुटु तिमी र म भन्दा धेरै दुखेका छन

हजार जीवन हामी भन्दा झनै धेरै झुकेका छन

तिमीले जित्ने भए मेरो जिन्दगी म हारिदिन्थें

मेरै मनमा तिम्रा सबै दुखाईहरु सारिदिन्थें ।